八方之前都預告，行事一向好低調嘅民主黨創黨主席「馬丁」李柱銘囝囝李祖詒（Joseph），6月會同女朋友拉埋天窗。祖詒嘅未來太太係邊位？就係莎莎老闆郭少明嘅細女郭詩雅，「馬莎」即將做襯家。八方最近八到祖詒會喺6月2日上午11點喺堅道嘅聖母無原罪主教座堂行禮，6月中仲會喺新加坡擺酒。
據知李家對呢單喜事好低調，八方早前都問過即將榮升老爺嘅馬丁，佢都唔透露半點安排上嘅風聲。但政圈已流傳祖詒鐵定喺6月2日同女友拉埋天窗，成個老襯，從此被困，兩方家庭友好都獲邀出席做見證。
撞正特金會 下月星洲擺酒
而喺香港行禮之外，據知新人仲會喺下月中於新加坡擺酒，唔少政界中人都會去飲，有人同八方笑笑口話，早前知道「特金會」下月中喺新加坡舉行，都有啲擔心，唔知喺當地活動會唔會因此受阻，例如封路嘅話就大劑嘞，但最新盛傳「特金會」或泡湯，反而鬆一口氣咯！