小記真係好憎男人蝦女人，特別係嗰啲有手有腳，仲要搶女人嘢嘅社會寄生蟲，唔好意思，小記太有正義感，激動咗少少㖭！其實唔怪我小記勞氣，喺前日就有個男人，光天化日下，當街當巷搶一個阿姐嘅手袋，好彩俾幾位真漢子捉住。
起飛腳逃走不果
住喺荃灣福來邨永昌樓嘅讀者阿Cat，喺前日下晝4點幾，行樓梯去到3樓，突然聽到有人大喝：「阿婆嘅嘢你都搶？」阿Cat望出去對面嘅永康樓，發現有幾個男人企咗喺度，其中一個着牛仔褲嘅阿叔俾兩個人㩒埋燈柱，着住白色制服嘅哥仔似係附近餐廳嘅職員，疑似偷袋賊郁身郁勢，仲起飛腳踢向左邊嘅黑衫熱心男，擺明想鬆人，邊有咁易吖！三位哥仔眼明手快，好快又將阿叔捉住，見拳腳唔等使，阿叔竟然用演技，坐咗喺花槽欄杆，仲話「我跑步咋嘛」，做戲做全套，仲喺後褲袋拎咗支水出嚟飲，之但係，就算有演技都要配合造型㗎，着牛仔褲跑步係咩style呢？
小記八到啲料，原來有位女士喺福來邨俾牛仔褲阿叔搶手袋，雙方一路拉扯去到永康樓，有幾位猛男見義勇為捉住阿叔，Cat話熱心男動作敏捷，有街坊估佢可能係便衣探員，而被人搶嘢嘅女士，其實仲好後生嘅，同賊仔拉扯時應該整親隻手，見佢同在場阿Sir邊講邊搓手踭，真係陰功豬！Cat住咗喺福來邨近30年，都係第一次見到有人光天化日搶嘢咁猖狂。
警方發言人話，被捕男子姓蔡（55歲），涉嫌企圖搶劫姓王女子（46歲），案件已經交由荃灣警區刑事調查隊第二隊跟進。