噚日下晝一點幾，有部掛P牌嘅白色七人車沿窩打老道向尖沙嘴方向行駛，去到蘭開夏道對開突然着火自焚，火勢仲越燒越猛，嚇到司機要跳車逃生。消防到場好快將火救熄。
有市民就影到火燒車嘅驚險一刻，見到七人車車頭不斷冒出濃煙，車頭瞬間陷入火海，司機想救都難，第一時間梗係走啦。網民對起火原因議論紛紛，有人話部車係名副其實嘅「烈火戰車」，仲話「架車中暑」、「熱到着火」！另外有網民就估計部車補養唔好或者亂改嘢，咁就出事囉。
消防員到場，出動一喉一煙帽隊撲救，好快將火救熄，初步相信係機件過熱引致火警。車燒咗都算啦，最緊要人冇事，22歲姓鄧男司機無受傷。火燒車期間，警方封鎖部份行車線，現場一度出現車龍，大概半小時解封。