五屆金球獎得主基斯坦奴朗拿度（C朗），連續第三年榮登《ESPN》「100最具影響力運動員」第一名，力壓美國籃球球星勒邦占士同C朗最大勁敵阿根廷球星美斯。
占士美斯緊隨其後
《ESPN》係根據社交媒體嘅追蹤數目、代言收入、網上被搜尋次數嘅基礎上計分，評定得分最高嘅C朗係全球最大影響力嘅運動員。呢位皇馬前鋒已經係連續三年穩坐榜首位置。曾贏得三次NBA總冠軍嘅勒邦占士喺名單上同上年一樣，都係得第二；而啱啱第九次奪得西甲聯賽冠軍嘅美斯就排名第三；上年八月喺巴塞以2.22億歐元（約20億港元）轉會到巴黎聖日耳門嘅尼馬就獲得第四名；瑞士網球手費達拿緊隨其後，獲得第五名。
C朗將會喺周六出戰歐聯決賽對陣英超嘅利物浦，呢次獲獎對佢同皇馬嚟講唔知會唔會有助提升士氣。
教練施丹就話，即使紅軍出到沙拿做籌碼，佢都唔會肯放走C朗走呀。佢仲話，C朗嘅心理質素好到冇人有，即使佢連續幾場冇波入，佢都可以好快進入狀態，下一場自然會入番夠本。佢亦都唔保證BBC組合會喺決賽入面一齊出場，因為皇馬嘅好球員實在太多喇。