新同盟范國威日前約咗前立法局主席黃宏發同佢嘅愛徒西貢區議員何民傑一齊去布袋澳食海鮮。唔明呢個飯腳組合？咖喱范解釋，何民傑曾喺3.11為佢助選，但對方出席唔到慰勞宴，直至前日先約到，索性叫對方約埋黃宏發一齊擦番餐。
咖喱范話發叔當年任議員時為過布袋澳村民搞污水牌問題，村民對佢感情好深，食肆仲會為發叔炮製獨家美食。咖喱范話席間由修改《議事規則》後嘅立法會運作，傾到梁君彥主持會議嘅質素，再由政治哲學談到香港政治嘅第三條路線，指發叔依舊思路敏捷。
咁發叔對梁君彥主持會議有何評價？咖喱范引述對方「有保留」，其間亦對歷任主席點評一番，以財政預算案議員修訂案為例指，自己唔會似曾鈺成咁寬鬆批幾百個，亦唔會似梁君彥收窄到幾十項，強調主席主持會議要夠「體統」，並協助解決各種衝突。