上周三(16日)快活谷夜馬，徐雨石狂掃四Win，威風八面，這位善於在谷中搵食的練馬師，當然不會放過今期(23日)夜賽機會，又再部署實力馬應戰，其中第六場三班1650米的「靚紫荊」便有晒搏殺動靜。
話說徐雨石今朝(22日)特意捉住「靚紫荊」的騎師田泰安，走到欄邊一角，唸唸有詞，似在講解「靚紫荊」的搏殺大計，而田泰安則低頭仔細聆聽，十分專心，反映兩人對今戰都高度重視。
5歲馬「靚紫荊」正值大熟大勇，近四仗俱跑同程1650米，獲兩冠兩亞全入Ｑ佳績。今次唞足個多月，試過大閘才再戰，備戰有誠意，加上此駒和田泰安特別合拍，人馬合作五戰得兩冠一亞一季一殿，出埋王牌報名出賽，肯定鬥志如虹了。