佛誕假期有咩搞？一班議員參加咗扶康會舉行嘅「議員共融烹飪比賽」，同智障人士合力炮製不同菜式，身體力行支持傷健共融。睇返參賽議員名單，唔少本身係「地獄廚神」，好似平時連煮公仔麵都會煮到黐底嘅工聯會麥美娟（Alice），但邊個估得到，組別金獎竟然落入佢手上？
奪金稱佛祖保佑
「要多謝我拍檔，亦要多謝嗰包泡菜！」八方問Alice有乜得獎秘訣，佢哈哈大笑話同佢無關，自爆噚日開始埋位作賽準備炮製大會畀佢嘅菜式「泡菜炒雞肉」時，有個問題嚇親人：「點樣開個爐㗎？」繼而就將大會預備好嘅雞肉，成堆放晒入個鑊，「點知啲雞肉好厚又一嚿嚿黐埋晒」。好在拍檔幫忙隔返開，其後加入泡菜起勢炒呀炒，結果炒到起死回生，經三名評判試食後奪金。
得知賽果後，佢直言今次肯定唔係贏在技巧，笑指或因噚日朝去咗浴佛，「佛祖保佑，佛系攞獎」。