如果話打女人嘅係賤男，咁打阿婆就係賤中賤！話說噚日下晝3點幾，讀者梁小姐見到身形似大番薯嘅男人，搭輕鐵去到元朗豐年路，同佢一齊落車嘅仲有一位婆婆，呢個時候大番薯起腳踢向婆婆，婆婆當場跌低，坐咗喺月台。
呢個世界仲係有好多真漢子嘅，一名哥哥仔睇唔過眼，一嘢就將大番薯壓落地下。梁小姐當時啱啱經過車站，聽到有人叫「做乜撳住我！」而坐喺旁邊嘅婆婆就摸住隻腳，睇表情應該好痛喇，過咗接近10分鐘，終於有市民行去一街之隔嘅元朗警署通知警察，「警察好快嚟到，6個差人圍住佢，佢仲好輕佻咁鬧人，都唔驚」。最後警員以手銬鎖起大番薯，將佢帶署調查，而婆婆就由救護車送院。
據講大番薯同阿婆三唔識七，雙方之前又冇碰撞過，大番薯點解要踢阿婆，要警察查吓至知，但係小記認為，無論如何，淨係識蝦阿婆，算咩男人呀！