有傳身兼中央港澳工作協調小組組長嘅國務院副總理韓正日內到粵港澳大灣區視察，最快下月初公佈規劃內容後，有親中團體噚日喺34.8℃嘅酷熱天氣警告下，喺露天嘅中環遮打花園搞咗個「尋找家鄉的商機－大灣區青年千人考察團體」活動，唔少大陸省巿嘅考察團都有出席，就連腳傷嘅政務司司長張建宗都有撐場。
同場加演 參加者「抗命」撐傘
典禮開始前，有工作人員話因為開遮對台上嘉賓「唔禮貌、影相唔好睇」，勒令收遮，但由於實在太熱，唔少參加者公然「抗命」，全程開遮擋太陽；部份考察團成員更喺活動其間「消失」，丟低橫額喺地搵靚位避暑，有小朋友甚至中暑，要喺救傷站接受治療。
台上主禮嘉賓雖然有頂遮蔭，但唔少人全程「廢青扇」不離手。但講到最有「誠意」肯定係搶先尋找「傷」機、戴上腳托出席撐場嘅張建宗。主辦活動嘅廣東社團總會主席梁亮勝話對張建宗帶傷出席表示感動，小肥張致辭時就用一向麻麻嘅普通話指：「這個活動是十分重要的，我不能不來的！」自爆因為「過度運動」拉傷腳，仲因此悟出大道理：「所以做乜嘢都唔好過份，要中庸之道啊。」發言時仲有幾聲咳噃。
會後被問到因乜運動受傷時？小肥張相當「口密」，只係話：「咩嘢都做啊，過份（運動）啊。」據八方了解，佢係因為喺屋企附近行山時太chur整親小腿。
李八方
