兩名大懵孟加拉竊匪噚日潛入深水埗大南街一幢唐樓爆竊，竟然搵間空屋去偷，但搜掠時講嘢又唔識細細聲，結果驚動鄰居報警，並上演一幕警員圍捕飛天蠄蟧驚險場面，吸引唔少街坊圍觀，兩賊三爬兩撥上咗天台後分頭逃落街以為走得甩，但一名31歲賊仔被眼利差人認出，涉爆竊被捉返差館。
施施然落樓被警認出
話說噚日晏晝12點左右，大南街257號唐7樓一單位住客，聽到隔籬冇人住嘅空屋，竟然傳出南亞裔人士嘅嘈吵聲，疑有賊偷嘢，於是報警。警員上樓發現單位大門鎖頭被撬，拍門問吓，屋內其中一人扮住客開門，一見門外竟然係差人，馬上關門。
兩個賊仔「冇碇匿」，只好冒險爬窗走，兩賊逃出窗外後遊走簷篷邊，「唔知佢哋係咪喺家鄉孟加拉爬樹爬得多」兩賊身手不凡，先由7樓爬上8樓，再由8樓爬到天台，其間嚇到樓下一班圍觀嘅街坊𠵱嘩鬼叫，有同鄉喺樓下用鄉下話不斷大嗌：「唔好咁啦，跌死你呀！」但兩賊唔知係聽唔到，抑或顧住逃走唔驚得咁多，只顧住向上爬，其間一個賊仔嘅手機跣手跌落街，「啪一聲」散開，嚇得途人心慌慌。
兩賊爬上天台後失去蹤影，圍觀街坊以為事件告一段落，原來還有下半場，其中一名穿紫色衫賊仔逃上天台後，隨即爬至毗鄰261號唐樓天台，然後扮住客沿樓梯落街，再急步離開，但被3名便衣警員認出制服，穿橙衣同黨就走甩。
全程目擊嘅街坊印度人Jacky話，被捕賊仔不時在深水埗「打躉」，對於賊人玩命逃避追捕，Jacky並不認同，「嗰度人來人往，跌落嚟壓死人，好危險！」
