凌晨5點鐘你會做啲乜？大埔普益街10幾位青年「精力充沛」，上周五凌晨5點幾出動，初頭喺行人路上行行企企，但無幾耐行出到馬路，似乎肝火盛下起衝突，其實矚目係一個出手甚狠嘅粉紅衫白短褲少女。
目擊事件同拍片嘅大埔街坊飛龍話，聽聞事件起因係有女仔被人呃感情，相約對方講數，但當中部份人疑有黑幫背景，最終變成咗一場大混戰。
手臂延伸做武器
據飛龍拍嘅影片，4男一女當時傾傾吓偈突然嘈起上嚟，跟住好多人由網吧走出嚟，一時間街上好亂，粗口橫飛。白短褲少女猶如馮盈盈演嘅小狼女上身，突然衝向一個男仔追住嚟打，但有人走出嚟勸交，包括一個黑衫嘅肥佬。但肥佬似乎男女雙方都唔幫，佢先係推開個少女，轉個頭又指罵男方。
不過少女唔領情，轉頭竟郁手打肥佬：「個女仔都幾狼，追住個肥佬來打……轉頭又用拳頭打，衝埋去亂打」。
當場面變成群毆時，有人竟然仲攞出咗一支伸縮警棍，有人仲被打到瞓低，有人見勢色唔對，走入一部黃色跑車避避，但其他人就越打越激烈。後來，另一白衣男亦加入做和事老，少女其後大嗌：「肥佬，停手！」又同另一個人講「你走啦！」最後佢哋唔知係咪知道警察就快趕到，突然全部散去。
警方就回覆話，當日凌晨約5時30分接報指有人於大埔普益里打架。警員接報到場，但未發現有人打架。
報案人稱在警方到達前，有關人等已離開，所以沒有進一步資料可以提供。警方指會繼續留意區內情況，如發現任何違法行為，定必採取適當執法行動。