有逾百年歷史、由香港遊艇會舉辦嘅春季帆船賽周日舉行，今年有逾400人參加，約90隻帆船一齊出海喺維港競賽，芸芸參賽者中有位影帝級稀客梁朝偉。原來呢次係佢首次喺維港參加帆船賽，最後佢架船DAVINLOONG喺參賽組別中奪亞。梁朝偉自爆細個已經想學船，鍾意佢同大自然間嘅互動，覺得對住寧靜大海有助減壓，但至年前先有機會正式學習，形容「一試鍾情」。
首次維港作賽，佢話感覺好刺激，因為船多水流急，同喺西貢等水域作賽感覺唔同。佢去年曾報名參加瑞士一個帆船賽，交咗報名費同請海外水手後，卻因為拍攝一電影要苦練鋼琴而放棄賽事。佢月底仲會到匈牙利參加一個帆船賽，希望吸取經驗升呢。