車路士今季雖然衞冕英超失敗，仲連前四位置都保唔住，但總算喺上周六擊敗曼聯奪冠贏番個英足盃，避免四大皆空。不過車仔今季嘅不利消息一單接一單，領隊干地難留，主力唔係喊走就被撬，最大件事係老闆油王可能唔揼水買人，下季仲可否保持喺英超同歐洲嘅競爭力，實在係一大疑問。
車路士領隊干地今季領軍大失水準，同管理層喺收購球員嘅問題上嘅矛盾亦浮晒面，所以一直有指班主阿巴莫域治準備請呢位意大利教頭食「無情雞」。英國傳媒就指干地今次贏到英足盃都幫唔到佢保住帥位，球會將會喺日內正式將佢辭退，而前巴塞隆拿教練安歷基同埋拿玻里嘅「煙鏟教頭」沙利都會係熱門繼任人選。
夏薩特傳10億投曼城
除咗領隊之外，車路士嘅球員陣容亦可能會面臨星散，隊中主力夏薩特一直都傳出話會轉會，除咗西甲嘅皇家馬德里對佢有興趣之外，最近又傳出英超曼城都有意出價一億鎊（約10億港元）收購夏薩特。加上呢位比利時國腳一直都冇正面回應轉會傳聞，又冇公開向車路士示忠，估計佢都勢必走人。
不過無論夏薩特想唔想走都好，車路士方面亦未必想留住佢，曾經喺車路士擔任助教，𠵱家執教蘇超基爾馬諾克嘅奇勒就話，夏薩特對車路士嚟講亦唔一定係非賣品：「以車路士𠵱家嘅陣容嚟講，要喺英超爭前四甚至冠軍未必足夠，球隊未來重組陣容在所難免，所以車路士可能會考慮賣走夏薩特套現，再喺轉會市場上大展拳腳。」
高圖爾斯暗示「莫財」即離隊
另一方面，車路士另一位比利時國腳泰拔高圖爾斯同球會嘅合約將會喺明年屆滿，不過遲遲都未有呢位門將嘅續約消息，高圖爾斯上周六英足盃賽後接受訪問就被問起佢嘅去留問題，佢就暗示除非球會買人，否則就會考慮離隊。
如果高圖爾斯仲以為車路士好似當年油王啱啱入主嗰陣咁豪爽，咁佢就真係太天真喇！事實上，車路士近年喺轉會交易上都有「縮皮」嘅現象，加上阿巴莫域治最近申請英國簽證續期遇到阻濟，油王隨時可能「嬲嬲豬」，向車路士閂水喉唔玩都未定。