拜仁慕尼黑喺上周六德國盃決賽爆冷輸畀法蘭克福，今季埋單只係贏到德甲一項重要錦標。雖然以拜仁嚟講只贏德甲未必係好滿意嘅成績，但全隊上下都一樣開心，喺周日進行巡遊，與球迷同樂之餘，亦為今季臨時拉伕回歸領軍嘅老帥軒歷基斯送別。73歲嘅軒歷基斯喺今季接替安察洛堤，歷來第四次出任拜仁主帥，最輝煌梗係13年帶領球隊成為三冠王，深受拜仁球迷歡迎。
至於新科德國盃盟主法蘭克福，當然亦要賀一賀佢，同樣喺周日搞勝利巡遊，當地氣氛比慕尼黑有過之而無不及，數以萬計球迷聚集喺法蘭克福市政廳外面，慶祝球隊30年以來首次贏得錦標。法福教練尼高高華亦會功成身退離隊，下一站正係拜仁，接替軒帥登龍門。