中央政策組改組為政策創新與統籌辦事處後，早前公開招聘年輕人加入做政策研究，噚日上任政策分析主任嘅其中一人為陳禧淦（圖），有指陳係「隱形民建聯」，故此惹來官場議論紛紛。
陳禧淦曾於2013年以城大公共政策學系學生身份，聯同民建聯觀塘區議員顏汶羽喺《文匯報》發表題為〈『佔中』行動是偽公民抗命〉嘅評論文章，而陳同時係九龍社團聯會觀塘地區委員會委員之一，而委員會主任正係曾於中聯辦任職嘅觀塘區議員黃春平。
顏汶羽向八方證實陳透過公開招聘加入創新辦，指陳曾於其地區辦事處實習，其後轉任為議辦職員、後來再到民建聯研究部工作，透露有鼓勵對方應考，體驗吓政府點做公共政策研究，相信陳獲聘與其政治背景無關，指政府取錄陳係對佢過往工作嘅認同。