「燒雞翼，我鍾意食！」就算係米奇都唔例外，香噴噴，真係巧吸引嘅呢！之但係，你偷食又唔畀錢，俾人影埋相你話幾失禮呢！
讀者陳小姐上星期四晚近10點，同老公食完飯，喺沙田好運中心拍吓拖行百佳超級市場，老公去咗睇其他嘢，陳小姐就行咗去超巿燒味部嗰邊。呢個時候，她離遠見到有啲嘢郁郁吓，已經心知不妙，「用電話zoom埋去，係一隻老鼠！」陳小姐話，由於當時燒味部職員已經收咗工，食物櫃上面只係剩番十幾盒包裝好嘅燒味，佢見住隻老鼠對住盒燒味係咁咬，但唔知係第一次食，所以無從入手，定係保鮮紙太厚，總之就點都唔成功！
女職員：嘩！好恐怖！
陳小姐慢慢咁越行越埋，發現隻老鼠屬於中型size，唔算肥美，係咪超巿冇啖飽飯佢食呢？可能出咗嚟行無耐，偷食唔叻，但隻老鼠總算一眼關七，發現陳小姐之後，即刻9秒9走咗！嚇到起晒雞皮嘅陳小姐話，佢臨走時將米奇嘅玉照畀收銀處職員睇，叫佢哋認真處理，女職員只係講咗句「嘩！好恐怖！」至於有冇做嘢，陳小姐就唔知喇！
陳小姐之後有打過畀食環，但對方要求佢send e-mail投訴，不過陳小姐嫌煩就不了了之，但佢希望百佳正視呢個問題！
百佳超級市場回應就話，公司非常關注事件，公司嘅品質監控部已立即派員與滅蟲公司職員一同到相關店舖查察和跟進事件，強調佢哋十分注重環境衞生同食物安全，店舖除了恒常清潔外，公司嘅品質監控部亦定期查察，並委託專業滅蟲公司恒常進行防治工作。百佳又請有關顧客聯絡顧客服務部以便跟進事件。