用過「吊吊揈」，叫過「衫碌拎」，現為全國政協常委嘅唐英年經常語出驚人，上周六應邀出席上海復旦大學香港校友會舉行嘅論壇，致辭時見到現場有復旦校訓「博學而篤志，切問而近思」嘅旗幟，想引用時卻由左向右讀出「思近而問切，志篤而學博」，有在場復旦校友忍唔住笑。
但原來復旦大學校訓，由右至左或左至右讀出都得，畢業於復旦大學仲擔任復大香港校友會副會長徐祖力教授話㗎。佢話入校同輔導員都討論過應該邊個方向開始讀？老師冇強調點讀先係唯一嘅正確。佢認為由左到右或從右到左都係通順，體現復旦自由而包容嘅本意，指「博學而篤志，切問而近思」講嘅係求學後達到嘅境界，「思近而問切，志篤而學博」則強調治學嘅態度同求學嘅過程，仲話唐唐嘅讀法，不經意間流露對方係位「行動家」喎。