蜘蛛俠，乜你嚟咗香港咩？咪住，望真啲，點解你肥咗咁多嘅？原來佢係一位冷氣維修工人，讀者何先生上周四下晝1點幾，喺跑馬地大廈天台煲緊煙，望過對面嘅冬青閣，見到有個大叔喺單位露台爬出嚟，一腳檻咗去冷氣機位，睇嚟應該係整冷氣。
「佢趴咗喺冷氣機度10分鐘，冇咩大動作」，由何生提供嘅相睇到，呢位大叔喺完全冇安全措施下，又爬又擒，目測應該係10樓，露台與冷氣之間條罅都有成1米闊，睇到都覺得牙煙，「我隔籬位同事嚇到唔敢望！」表演完一輪驚險雜技，呢位阿叔又一腳檻番上露台，行返入屋。
何生話，佢自己都係做維修保養，知道唔少同行開工時都貪方便，但係咁誇張都係第一次見，「搭個棚都係幾千蚊箒，可能佢係老細，為咗慳錢啦！」搵食箒，唔使搵命博嘅！