香港中文大學有人將幾十架共享單車上鎖「私有化」？讀者黃小姐稱她近日見到中文大學中大教研樓附近泊咗好多GoBee Bike喺度，佢諗住租嚟踩吓，點知去到時卻發現超過廿架共享單車俾人用鐵鏈額外上咗鎖，好似私有化咗咁，懷疑有人違規。
小記上周五現場了解，喺中大香港生物科技研究院同中大教研樓對開，見到兩批共33架共享單車，發現除咗短鐵鏈同鎖頭，仲有長鐵鏈將鎖埋啲單車，冇幾遠豎咗個告示牌，提醒「此等GoBee Bike單車暫停使用，等候單車公司回收」。
小記打去保安處問，原來近日唔少人喺中大亂泊共享單車，於是保安人員就「捉晒啲單車」，等單車公司派人攞番走。中大發言人亦話，近期校園有共享單車俾人隨意擺放嘅情況出現，對行人和道路使用者構成障礙及危險，並違反大學有關單車停泊規定。所以保安處只係跟規矩鎖車。