為踢爆假和尚不遺餘力嘅「Madam翁」翁靜晶，同假和尚似乎特別「有緣」，估唔到去到英國倫敦都遇上，一如在港即場大踢爆，仲「感化」埋假和尚。
翁靜晶星期六凌晨喺「佛門警訊 Buddhist Alert」群組上載短片，話喺16日一落機就見到假和尚喺街頭行騙，片中一名身穿和尚服裝男子正向外籍途人索求金錢，Madam翁即刻喝止。隨後Madam翁向對方表明專門捉假和尚，追問佢嚟自邊度同有冇戒碟。假和尚最初只係重申冇呃人等，又攞出黃紙紅字紙符，點知Madam翁踢爆「你知道佛陀說不能用符咒，你不是真的和尚，我叫警察來」，又叫對方念大悲咒，但對方只識答「大悲咒就是大慈大悲」。
Madam翁仲要求對方脫掉袈裟，否則報警處理，對方最終脫下並承諾不會再穿袈裟騙人，Madam翁又贏一仗嘞。