記協前晚喺會展筵開約60席賀50歲生日，唔同年代嘅傳媒人都現身支持，當然包括唔少各大電視台嘅男、女主播，論風頭躉程度，首推擔任晚宴主持嘅有線靚仔記者黃浩賢，有名大家叫做「有線小鮮肉」，毋須懷疑佢嘅青靚白淨程度，難怪連同佢拍檔做主持嘅前輩、至今依然好有氣質嘅無綫前主播魏綺珊都忍唔住話想摸吓對方嘅皮膚㖭。
AO歌王唱足全場
但在場嘅新、舊女主播都唔失色，着得靚靚滿場飛都好吸睛，好似轉型咗做司儀同藝人嘅方健儀咁，四出同老友記selfie集郵，其中一張有現時仍喺無綫搏殺緊嘅詹前穎同龍惠榆，詹前穎仲嘟起個嘴好cute喎！而講過冇有線就冇佢嘅張寶華，亦同唔少行家合照留念，包括久未露面嘅徐忠明等。晚宴結束前唔同傳媒機構嘅團體照就張張都好具震懾力，唔少人都係上到台先知，原來成日見面嘅行家喺唔同時空，服務過同一機構，點估到喺記協50年先至「相認」。
講起當晚表演嘉賓，都係「靚」字派，就係廠商會行政總裁、人稱「AO歌王」嘅楊立門。除咗以電視劇《大時代》主題曲《歲月無情》為晚宴揭開序幕，其後又聯同港台節目《頭條新聞》主持人曾志豪聯手「表現」一曲《無可奉告》，楊立門負責唱、小豪子負責歌中獨白，將近年發生嘅村官打記者、粵語係咪母語等新聞融入其中，最後楊立門就以一曲《Shall We Talk》做壓軸，相信都係唔少港媒對住官字兩個口嘅嘅心聲咯。