獲民建聯同工聯會力撐出戰東區區議會佳曉選區補選、今年30歲嘅Tree根鍾樹根前助理植潔鈴（Elaine），噚日喺小西灣舉行造勢活動，捉埋同佢相當似樣嘅31歲家姐植潔雯及27歲細妹植潔瑩以姐妹檔現身。
自爆婉拒街坊介紹囝囝
Elaine話唔少街坊都覺得佢同家姐似樣，加上身形相近，好多時會認錯人，笑言可能係優勢，令佢可以用分身術拉票；其間佢又叫傳媒問姐妹一啲「私人問題」，有傳媒就問係咪個個名花有主？原來姐妹都有拖拍，反而Elaine冇着落。Elaine繼而自爆有街坊話要介紹囝囝畀佢識，但佢通常婉拒：「我話𠵱家都嫁咗畀社區，除非你想冇人服務社區啦！」唔知呢個係咪佢叫傳媒提問嘅目的？
經常着白褲現身拉票嘅Elaine又話，有網民提佢要注重個人衞生，唔好日日着住同一條白褲，佢強調自己好多條白褲，網民可以放心。