前法國名宿兼前歐洲足協主席柏天尼爆料稱，1998年法國主辦嘅世界盃，法國足總就做咗「小技倆」，以確保東道主唔會喺決賽前夕，即淘汰賽階段碰上當時大熱巴西，以保送法國殺入決賽，最終亦憑住呢個「走線」之利，喺決賽一舉擊敗巴西捧走世盃。
柏天尼表示，法國同巴西原本係隨機分配到唔同嘅小組，但籌辦世盃嘅法國足總就做咗「手腳」，以確保巴西進入A組，而法國就被安排喺C組，咁樣嘅分配下只要兩支球隊都順利首名出線，就可以肯定唔會喺決賽前相遇。
「我哋唔覺得有咩嘢問題，花咗六年時間嚟籌辦世盃，點可能唔做一啲手腳。」柏天尼繼續踢爆：「你會相信其他主辦國，真係冇做手腳嗎？」的而且確，歷屆咁多支主辦國都喺抽籤上佔到甜頭，其中今屆世盃主辦國俄羅斯，分配喺A組嘅對手亦只係烏拉圭、事隔28年再闖決賽周嘅埃及，同埋32支球隊中世界排名最低嘅沙地阿拉伯，被外界認為係上籤有力爭取出線。