新華社報導，習近平主席指示國家科技部、財政部容許國家科研項目經費資助香港科研項目。習近平有此動作，係回應香港24位中國科學院、中國工程院院士聯署要求嘅。
於是左丁山問一位大教授：「香港科學家以後會唔會有大把水去支持研究？」大教授素來小心，佢只係回答：「未必」。大教授有頭有面，佢既然答得咁小心，即係話香港各間大學之理工醫科教授、博士唔駛過份歡喜住，而據一般申請研究經費經驗，香港如此，美國如此，申請經費過程都幾長，由學者寫研究建議書開始，要經歷不同審批程序，要與其他內地學者、香港澳門學者競爭，好似上擂台比武咁，要過五關斬六將先至可以成為最後勝利者──得到一筆研究經費。目前申請細節尚未知，如果北京肯進一步來吸引香港學者，可以撥一筆款項（譬如五十億至一百億元人民幣）只供香港澳門科學家申請，內地學者就排另外一條隊，避免香港與內地學者直接競爭，咁樣香港科研學者就發達咯，大把人才會願意留在香港都唔定。但如此方法，會否惹來內地學者反彈呢？
統戰手法五花八門，吸引科學家，用錢最實際，有官費資助科研，科學家先至有機會名成利就嘅箒，美國之吸引到全世界科技精英留美，講穿咗就主要係一個錢字，再加上自由思想環境箒，而又以研究經費充足為最重要，當一家耶魯大學嘅全年經費超過香港8間官立大學經費總和嘅時候，你以為邊間大學會聲名更顯著呢？科學家更願意去邊一間大學做研究呢？
北京願意批錢畀香港科學家做研究，當然有政治目的，亦有實用一面，小小香港，已有幾十名中國科學院、中國工程院院士，科研底子厚，佢地嘅研究成果可收為國用。其次係呢一班人好可能離港，在英美名校做教授或博士後研究，之後一去不返。如果能夠以工作職位或研究經費引誘佢地留港，與內地結合，總勝過將人才送給美國。益唔益到本地尖子呢？就要睇本地學生心態咯。一位教授有如此故事：一位內地生叩門要求教授收佢為研究助理，教授問：「你想點？」內地生話：「你係MIT博士，我想四年後去MIT讀博士，跟你做研究一定可以幫到達到目的，你放心，我一定考到一級榮譽嘅！」如此進取，剛入一年班已經想到四年後嘅事，本地生大大不如，點夠砌呀！