皇家馬德里教練施丹講到明，主將基斯坦奴朗拿度（C朗）肯定可以喺禮拜六鬥利物浦嘅歐聯決賽中披甲殺敵。現年33歲嘅C朗自從喺今個月較早時賽和巴塞隆拿嘅國家打吡中受傷後，就一直未有再踢過任何比賽。被問到呢名葡萄牙前鋒嘅情況時，施丹就話：「目前佢嘅狀態係達到120%，佢很好，如果佢有120%狀態，我係冇問題的。」皇馬禮拜六將力爭連續三屆贏得歐聯冠軍，如果成功嘅話，施丹將與安察洛堤和披士利睇齊，成為史上第三位能三次稱霸歐洲嘅主帥。安察洛堤過往曾經喺2003同2007年帶領AC米蘭奪冠，另外喺2014年助「銀河艦隊」登頂；披士利則喺1977、1978同1981年帶領利物浦奪冠。