今季意甲今日煞科，上周六率先上演一場祖雲達斯迎戰維羅納，亦都係老牌門將保方告別都靈嘅最後一戰。老婦人賽前已提早贏咗意甲冠軍，煞科戰主場對篤定降班嘅維羅納憑魯加尼同埋比真歷入波，最後以2:1小勝一場攞晒三分，以勝利送別效力17載、今仗上陣63分鐘被換走嘅保方。仲未言退嘅保方，下一站去邊未有定案，有傳巴黎聖日耳門（PSG）等大球會都對佢有興趣；不過適逢保方母會帕爾馬啱啱喺上周五意乙煞科贏波確定升班，唔知佢會唔會考慮吓「回家」度過職業生涯最後階段呢？
40歲嘅保方01年以超新星姿態轉投老婦人，17年嚟幫球隊贏到九屆聯賽冠軍、四次意盃冠軍，唯一遺憾就係拎唔到大耳朵盃。佢上個禮拜五喺instagram發表感言，並以喺老婦人度過嘅6,111天作為主題留言︰「多謝你哋每一位。聽日就係一個旅程嘅終結，但呢個亦係新旅程嘅開始。」
無意掛靴展開新旅程
雖然要離開，但保方無打算掛靴，仲打算繼續喺頂級聯賽征戰：「我唔係嗰啲想喺三、四級聯賽掛靴嘅球員。我係一個鍾意接受挑戰嘅人，唔會畀自己庸庸碌碌咁過。」
既然保方開到聲，歐洲豪強梗係「收到」，據報英超車路士、利物浦同埋曼城有意將佢收歸旗下。仲有報道話，法甲豪門PSG已經開咗一紙兩年合約，只係等緊保方首肯。
母會連升三級返意甲
保方嘅母會帕爾馬傳嚟好消息，佢哋上個禮拜五喺意乙煞科戰作客以2:0擊敗史柏斯亞，以較好嘅對賽成績力壓同分嘅費辛隆尼，拎到亞軍升上意甲。其實呢支昔日班霸喺15年因為破產降落意丁，但僅用三季就連升三級重返頂級聯賽，過程夠晒勵志！橫掂都未掛靴，其實保方不妨考慮吓重返帕爾馬，話唔定可以帶領母會再闖高峯。