歌仔都有得唱：「我有權散步，你有權洗澡！」呢排日日都超過30℃，熱到小記好想日日浸喺水入面，但太子一位阿叔急不及待，乾脆走落水池降溫，真係熱得咁緊要？
途人直行直過
讀者Jason喺星期四（17日）凌晨近1點，經過太子始創中心對面嘅公園仔，竟然見到一位光脫脫嘅阿叔，坐咗喺水池入面，Jason話個阿叔年約40、50歲，雖然段片影唔到阿叔正面，但Jason認為係國內同胞，「邊有香港人會咁做」，其實個池周圍都人來人往，但係路人都冇反應，掂行掂過。
從Jason嘅片段見到，阿叔肥屍大隻，一時趴喺度露出肥美嘅屁股，一時又坐番起身，頴吓腳趾非常疏乎。Jason喺現場停留咗10分鐘就走，阿叔都未捨得走，所以都唔清楚阿叔玩咗幾耐。
小記去現場了解，原來公園仔叫「旺角康民角」，水池只有0.2米水深，基本上只係浸過腳眼多啲，街坊話隔籬係直通巴站，平時有好多內地同胞徘徊，入夜後不時有露宿者出沒，但從來未見過有人跳入水池玩。