內地保險公司人民保險集團（1339），噚日委任咗食衞局前局長高永文同中央政策組前首席顧問、人稱左王的邵善波為獨董，本周一生效，係兩人離開政府之後，首次擔任上市公司獨董職務，可以話係處女下海啊。
獨董只係開吓董事會提供吓意見，唔使做實務嘢嘅，基本報酬係25萬人仔，如果擔任埋專業委員會主任委員，就有額外5萬人仔，加埋一年都成30萬人仔，不過扣埋稅就冇咁多喇。
講開又講，近年高官離開咗官場後，唔知點解好鍾意幫保險公司打工，最出名就係前一屆食衞局局長周一嶽，做咗友邦香港嘅首席醫務官，近排就有商經局前局長蘇錦樑，去咗騰訊（700）入股嘅英傑華人壽做獨董，係咪保險公司特別好撈呢？