正當娥特前日去咗大灣區內城市考察，為港人變身「大灣區人」做好準備之際，佢嘅另一半、「第一先生」林兆波，自然要一支公打發時間。
巧遇呂秉權 懶理背囊打開
浸大新聞系高級講師、前有線新聞中國組記者呂秉權喺facebook專頁透露，前日喺港鐵旺角去中環嘅車廂內遇見「第一先生」，當時佢見到林兆波個背囊打開咗，所以「輕篤咗佢手臂兩下」提醒，又形容當時林兆波好有禮貌咁回應：「多謝你提醒我，裏面只是衣服而已。」並且隔咗幾個站、等人少啲，先將個背囊閂返好，似乎唔想阻到人，認真細心體貼。而呂秉權之後冒昧邀請林兆波合照，引述林生「帶住笑容配合」。
查實呢位特區「第一先生」，同上屆嘅「第一夫人」梁唐青儀好唔同，對傳媒向來好友善，連娥特都講過，要向老公學習點樣面對傳媒，而網民都見兆波憶龍蝦，有網民睇完合照留言話：「冇G4保護嘅？以前689老婆唐青儀都成村保鑣喎！」另有網民未忘娥特唔識用八達通嘅搞笑場面，問道：「第一先生要教特首點用八達通搭港鐵」、「佢（娥特）老公識用八達通！」
李八方