民政處問區議員，估計有幾多人出席六四。用辭真係用「六四廿九周年燭光晚會」嗎？雖然「多此一問」但也算上心。收到上級指令，民政做埋六四狗仔隊，事先偵測六四吹什麼風，預早點人頭，話唔定，高級行政主任已被order六四前，要去各區「點相」，揸住點名紙，問區議員呢個嗰個，去定唔去？做死公僕老細搵公務員笨實，問這種葉劉都藐嘴破口大罵的低能問題。笨人出口，區議員答腔的話，會有乜下場？政治低壓槽襲港，預咗政府會出陰招。泛民區議員善意回應，預計N人出席，雖然只係靠估，但選舉主任揸住呢樣，指證你「心中有數」，等同煽動、煽惑市民參與一個高叫「結束一黨專政」的集會！明年被DQ參選，區議會全面走向東區區議會黑衣人睇場模式。
民政處還問區議員，點解少咗人出席六四。呢條從政治數據到哲學倫理大思辯的題目，民政處唔搵學者解話，行埋區議員，唔通想考議員有冇鬼眼？維園坐滿，警方詐睇唔到，篤細條數，已成常態。今年如果預告，都江堰村官扮老百姓「打老師」的事件會在維園重演，六四燭光會被打沉嗎？