立法會3.11補選候選人陸續向選舉事務處遞交選舉開支，喺九龍西擊敗姚松炎嘅民建聯鄭泳舜總開支係138萬，全數由民建聯找數，同另一建制候選人鄧家彪一樣有人埋單。佢最大筆嘅開支用喺選舉廣告，共72.5萬元，包括搵政界名人幫佢拍片宣傳。
高過元秋 鼠王芬
根據申報，可以睇到阿舜的確群星拱照，所有建制派區議員都有為佢錄聲帶支持，又租出辦事處畀佢放選舉物資。除咗地區樁腳，阿舜亦着力網上宣傳，一共用咗2.6萬喺fb同Google賣廣告。
咁佢個facebook邊條片係最多人睇呢？fb嘅發票顯示，佢同鄺美雲拍嘅推動動物友善政策有1.9萬人睇過，條片就用咗250蚊賣廣告。而佢同民建聯元秋條片就有1萬人睇，至於鼠王芬嗰條就得7千幾。前主席曾鈺成亦有為阿舜拍片，都有1.7萬人look過。
之前民主派多次批評阿舜偷步宣傳，喺報名前已經喺巴士車身、地鐵廣告不計其數賣廣告，但佢無做有關申報，只係申報咗小巴車身廣告，估計參選前已經將廣告下架，咪唔使計落選舉開支咯。