路不拾遺係美德，讀者何先生上星期二（8日）喺新巴上執到銀包，入面有幾百蚊現金、幾個玉墜，佢都冇貪心，交畀車長，但之後佢問番新巴，對方話站長冇見過個銀包，之後又改口話站長整唔見，一番好意卻換來一肚氣，一輪交涉之後，新巴先話報咗警，但係就冇交代站長點解會整唔見銀包。
新巴稱已報警
話說5月8日零時，喺柴灣開舖嘅何先生同太太喺樂軒臺上咗架N8P，坐咗喺下層右邊第二排，冇耐就發現窗口位有個黑色銀包仔，相信係其他乘客留低，何先生打開銀包，發現入面有幾百蚊現金，仲有4個玉墜，唔排除係老人家嘅銀包，為咗保險，何先生仲影低入面嘅物品，去到筲箕灣落車前，將銀包交畀車長，仲叮囑對方一定要交畀站長。
到早上，何先生打去新巴熱線詢問銀包情況，點知對方話冇收過站長交出嘅失物！之後一位新巴主任打番畀佢，改咗口話車長係有交銀包畀站長，但站長唔小心唔見咗。但主任又話，唔小心遺失銀包唔等於刑事罪，所以公司唔打算報警，仲叫何生喜歡嘅話可以自己報警。
何生對於新巴嘅求其態度，完全接受唔到！佢認為，係唔小心唔見咗銀包，抑或係有人一時貪心，新巴都應該查清楚，「我認為好嚴重，就好似我交咗證物去差館，差人話唔見咗證物咁。」仲話，如果新巴冇合理解釋，佢唔排除會自己報警。
《蘋果》向新巴查詢呢件事，新巴發言人唔肯詳細講事件始末及調查進展，只係話公司已經知悉事件，並已報警處理。
