世界冠軍騎師莫雅為咗要贏2018年第144屆肯德基打吡，不惜犧牲英國大賽事，走咗去美國騎最近贏咗杜拜世界盃嘅Mendelssohn，賽前被認為好有機會，20隻出賽馬之中，成為次熱門，賠率係5倍，大熱門係Justify 3倍，美國時間5月5日開賽時，有雨場地係濕泥，與杜拜之乾爽厚泥跑道有好大分別，或者因為如此，莫雅隻馬大敗而回，居然跑第20名包尾，令捧場者大失所望。冠軍呢，就係Justify，由頭帶到尾，贏得幾容易，睇吓佢有無資格贏到2018年美國賽馬三冠王嘞。
由於Justify取勝，德克薩斯州近聖安東尼市一個馬場有人發大財，一位中年黑人女士，係馬場常客，在打吡日當然入場睇肯德基打吡直播，佢事先買咗一條Pick 5，類似香港嘅獨贏五串一，但一定要係連續五場直落，又有啲似香港嘅六環彩六寶獎，投注18元，由Justify守尾關，之前四關全中，包括一隻40倍冷門，第五關當然非常緊張，結果中晒，派彩高達120萬美元，即時成為電視新聞，傳遍全美。
呢個當然係馬迷神話故事，正式係刀仔鋸大樹，係馬迷都有嘅夢想，但呢類好運，大概一生只會有一次，幾難中完又中。故此不久前彭博報導嘅馬場賭神Bill Benter在香港贏咗78億港元嘅新聞（蘋果5月6日），特別惹人注目，呢位先生在1989年起至2007年賭香港馬，大獲全勝，中咗三 T億幾銀都唔攞，等馬會將彩金捐咗俾慈善機構。
左丁山唔識呢位先生，半信半疑，不過律師W在陸羽飲茶時就話確有其人，Benter曾是某扶輪社社員，律師W在扶輪社社交活動，與佢認識。律師W話：「Benter先生嗰陣時好慷慨，捐錢俾扶輪社做善事，絕不托手踭，十分豪爽。我唔明白佢點樣賺到咁多錢，只知佢經常賭馬贏錢。現時先知道佢係馬場賭神。」世界上竟有如此奇人能夠憑電腦方程式推算，連續贏馬十幾年，可算奇蹟。嗰陣時還未有手機、電腦網上投注，Benter請咗好多散工填飛到投注站落注，當生意咁做。肥仔K有一位印度人朋友，印度人講：「我記得Benter，當時有同鄉喺佢度做散工，負責填飛嘅。」假如Benter今日還在經營賭馬公司，憑今日電腦科技，可能更加震撼！