色狼出沒！有個着拖鞋嘅猥瑣阿叔，懷疑近日喺一個疑似露天排檔嘅地方行街，特登蹺手撞少女，喺短短5秒內兩度「批踭」非禮兩個女仔嘅胸部。有街坊影低咗佢嘅惡行，仲將短片放喺WhatsApp同fb，叫大家有所警惕。
呢位猥瑣阿叔身材都幾肥，當日佢着白T恤、短褲同踢拖，企喺一個有唔少太陽遮同頂篷嘅露天排檔或街市內。當時街上人流唔算多，呢位猥瑣阿叔就蹺起雙手，手踭向外，然後佢走近一位迎面而嚟、着黃色衫短褲嘅少女，仲懷疑故意用手踭撞向女仔嘅胸部。
少女俾人撞胸之後都好愕然，回頭望猥瑣男，但猥瑣男就冇事發生咁，繼續向前行。之後唔夠5秒，猥瑣男又用右手踭胸襲另一位着長裙白衫嘅少女，但女事主未有為意。
有人懷疑可能係內地發生而唔係香港，但《蘋果》讀者羅小姐就話影片背景同上水舊墟有啲相似，佢以前都遇過類似批踭黨，希望警方可以加強巡邏。