雷神莫雷拉與潘頓爭冠軍騎師大鬥法，兩人既有騎功，鬥志亦特別旺盛，對練馬師來講，現階段借用佢哋出擊，往往事半功倍。
好似這晚（16日）谷中第一場五班1650米，徐雨石的「悅目星光」初配潘頓，便立即有突破勝出，單Win及組合獨贏A2分別派71及30元。
5歲澳洲自購馬「悅目星光」以往15戰只上名一次，就是上場泥地1800米用黃皓楠跑第二，雖似乎開始有進步，但今仗跑截然不同的谷草1650米，仍想唔到贏得咁易，在潘頓胯下沿途守第六位，克服11檔阻力，直路在外叠一衝，如入無人之境，大勝3馬位，像變了另一匹馬般，打開馬兒在港勝門。
「悅目星光」跑出1分39秒67，破了2003年9月17日「權生威」（已退役）的1分39秒7舊五班谷草一哩班際紀錄時間。
徐雨石表示「悅目星光」破班際紀錄彈甩對手，表現是預期之外，此馬性能偏長，上場增程至1800米都近，今次跑一哩亦合，石哥自爆今次是潘頓主動索騎，大讚潘頓今場攝位好靚，功勞甚大。
頭場二至四名分別為「升力」、「五星特工」及「金叻星」，四重彩派100,497元。