巴塞隆拿球星恩尼斯達（小圖）周二喺一個足球場內接受電視台訪問嗰陣遇到一件罕見意外，雖然小白本人冇受傷，不過就嚇餐飽，而事件亦都造成18人受傷。
事件發生喺巴塞隆拿市內嘅campo de la Satalia足球場，恩尼斯達周二中午喺嗰度接受西班牙電視台訪問，不過球場內為一個到場觀看訪問嘅球迷而設嘅臨時看台突然倒塌，搞到電視台要終止訪問。據報道現場大約有50名球迷，18名傷者中包括兩位小朋友在內嘅11人被送到就近醫院，另外七人就喺現場接受治理，好彩所有人傷勢都唔算嚴重。
電視節目主時人Risto Mejide就表示為咗尊重傷者，所有已拍攝嘅內容都唔會播出。至於小白其後就喺個人Twitter發推文，表示要為在場所有人送上支持同鼓勵：「今日我哋遇到一件可怕嘅意外，希望傷者可以盡快康復，畀所有人一個擁抱。」