人稱大K嘅帝國集團主席郭炳湘喺2012創辦「郭氏學者協會」，同時亦設「郭氏獎學金」資助學生負笈海外進修，本年度呢個獎學金會授予5位學生，其中兩位會喺牛津大學攻讀公共政策碩士學位，另有一位喺牛津大學讀哲學、政治及經濟學學士學位，餘下兩位則會到康奈爾大學攻讀與酒店相關嘅課程。
獎學金2012年成立以來，已有16名學生獲得全額資助，喺牛津同耶魯攻讀公共服務相關嘅本科和碩士學位課程，另有4名學生獲得「郭氏酒店旅遊業獎」，以交換學生身份喺康奈爾大學攻讀與酒店相關嘅課程，大K寄望獲獎者成為公共服務同酒店業嘅領導者，回饋同貢獻社會。
大K噚晚仲同郭氏學者協會成員聚首，與在場學者交流對公共服務同回饋社會嘅心得，而英國牛津大學布拉瓦尼克政府學院教授Thomas Hale仲以「世界在變‧中國也在變」為題演說，大K話發人深省。