小YY在美國讀大學時，有好多馬來西亞華人同學，絕大部份都係在大馬「優惠土著巫人」或「巫人優惠政策」下，入唔到前列大學，所以出外留學嘅；當然並非個個都可以出外留學，但馬來華人平均嚟計，明顯比巫人有錢，出外到英美澳加紐讀大學，不少人都負擔得起。當年馬來西亞首相就係Mahathir bin Mohamad（馬哈地．穆罕默德），馬哈地在1981年至2003年做首相，長達22年之久，不少優惠巫人政策都在馬哈地任內出現，所以馬來西亞留學生對佢嘅印象麻麻。
點知5月9日之馬來西亞大選，今年92歲嘅馬哈地率領反對黨「希望聯盟」，竟然奪得國會議席過半數，成功趕走現任首相納吉布，確係始料所不及，好多馬來西亞時事專家大跌眼鏡。小YY第一時間收到啲馬來同學在fb、WhatsApp嘅訊息，原來人人歡呼，熱烈歡迎馬哈地回歸噃。乜咁奇？納吉布在任內，GDP增長得快，又親近中國，熱烈拉攏馬雲幫助馬來西亞經濟網絡化，歡迎強國人到馬來西亞投資，馬來人民生活無憂，何解要以選票歡迎老神回歸？答案大概只有一個，納吉布之IMDB貪污醜聞，被華爾街日報揭露（美帝媒體係亞洲政客敵人！）後，納吉布政府施展拖拉戰術，一於當冇到，「X官我自為之」，甚至新加坡政府都有情報用來檢控新加坡一啲外國銀行家涉及IMDB事件之後，納吉布仍然視作無事。馬來西亞選民看在眼裏，知道莫奈他何，唯有趁選舉表達強烈意見啦。
這就是梁振英講過Vote Them Out嘅最佳實踐，一個國家地區，只要有民主選舉，始終人民會將怒氣怨氣化為力量，趕走在朝派，送反對派上台。正如西方一句選舉口號Vote the Rascals Out嘅意思。在民主選舉制度下，冇一個政黨可以永遠連續不斷咁霸住國家管治權，馬來西亞「國家」陣綫，自脫殖獨立之後，連續掌權61年，今次也難逃一敗。乞人憎之政府即使投票之前承諾派錢免稅，意圖買票都無法改變形象，被人民唾棄。有一點左丁山感慨嘅係泰國軍人、印尼軍人都曾長期干預選舉，現在泰國軍人不滿民選政府，索性發動政變霸佔權力。但馬來西亞軍隊絕對政治中立，立國以來，從不利用槍桿子搞事，令馬來西亞得以維持政權和平輪換，好值得尊敬。