潘頓同雷神莫雷拉為香港冠軍騎師寶座鬥得火熱，成為季尾熱門話題，尤其領先之雷神上期尾場犯規，下月6日起停賽兩期，令爭冠形勢更加緊湊。
目前落後9場嘅潘頓，近季同霍利時合作唔多，今季就只得4次，但獲得1冠1亞，上名率啱啱一半，今晚(16日)騎練合作第二場四班1200米隻「再創商機」，隻馬由徐雨石馬房轉投霍利時後跑6次唔上名，但其中4場「梗頸四」，強配潘頓都係希望贏馬交代。
奇怪在「再創商機」本月5號谷閘由郭能主理，直路湧上獲季軍走勢悅目，郭能呢場卻冇馬騎，原來今仗最初的確由郭能壓陣，但上星期三即報名表公佈前一日，霍利時臨時改變主意，改用潘頓出戰。
郭能有馬騎變冇馬騎，當然唔多開心，「再創商機」被潘頓睇中撬走，從馬迷角度真係值得跟進，似乎潘頓知道隻馬狀態已到位，今場仲有運抽到黃金1檔，有望守到靚位。
「潘、霍配」今季唯一頭馬就係「雷超」，「雷超」亦係好難出頭嘅賽駒，結果潘頓一騎即開齋。「再創商機」似足「雷超」，即管睇睇會唔會有同樣效果勝出。