注意！注意！韓劇界靜咗一排，似乎終於走出限韓令嘅陰霾，儲足彈藥，請郁一眾男神回歸公仔箱，太太們，煲劇喇！
1. tvN《無法律師》
由李準基擔正嘅tvN新劇《無法律師》，啱啱上禮拜六開播，係李準基事隔一年回歸拍劇。佢喺劇中飾演一位專幫人走法律罅嘅辯護律師，呢個角色非常慘情，細個親眼睇住阿媽畀人害死，成長路上都一心要為阿媽報仇。
2. JTBC《Sketch》
去年榮升人夫兼老豆嘅Rain，終於都回歸喇！事隔兩年，接拍JTBC警匪劇《Sketch》，下星期五開播。今次Rain飾演王牌刑警，直覺、判斷力同執行力都No.1，以為前途一片光明，點知未婚妻突然遇意外過身，Rain就着手調查，誓要揭露真相！
3. tvN《Mr. Sunshine》
今年最觸目、最令人期待嘅韓劇，一定非《Mr. Sunshine》莫屬，7月喺tvN播出。劇組請得郁八年無拍劇兼荷里活身價嘅李秉憲擔正，仲飛去美國取景，有傳20集嘅製作費破晒韓劇紀錄，高達300億韓圜，即係超過兩億港紙！歷史劇《Mr. Sunshine》講李秉憲喺朝鮮做奴隸，後來有機會去咗美國，變成美國海軍陸戰隊軍官，返朝鮮駐軍，期間邂逅到貴族千金。
4. MBC《我身後的Terius》
去到9月，就輪到蘇志燮上陣，相隔2年8個月回歸公仔箱，拍MBC新劇《我身後的Terius》。有報道指今次蘇志燮會做特工，幫助突然無咗老公嘅女主角查案，揭發陰謀。
5. tvN《阿爾罕布拉宮的回憶》
男神仲有無見三年嘅玄彬，落實同朴信惠合作，拍動作驚嚇奇幻劇《阿爾罕布拉宮的回憶》。故事講玄彬去西班牙工幹，住喺朴信惠開嘅舊式旅館，點知齊齊被困。劇組特地安排喺西班牙南部阿爾罕布拉宮取景。
6. tvN《阿斯達編年史》
最後，去年榮升人夫嘅宋仲基壓軸出場，繼《太陽的後裔》之後，相隔兩年回歸拍劇。佢落實婚後接拍嘅第一部韓劇，係tvN嘅古裝魔幻劇《阿斯達編年史》。有消息指宋仲基會飾演開國神將，應該唔少動作戲。而女主角方面，有機會係《太陽》第二女主角金智媛，外界都好期待見到兩人再度合作。套劇嚟緊7月先開拍，要等到出年年頭先開播！
