元朗12點後邊個話事?噚日網上熱傳一段影片，拍到前日母親節凌晨喺西裕街，一個着夏威夷恤嘅惡爺疑飲醉酒拍打衝鋒警車，仲「手指指」疑似指罵警員，奇怪嘅係警車上冇人有反應，慢慢駛走架警車就算數。而惡爺其後又俾一名更惡嘅陀地驅趕，成段片好似顯示邊個先係嗰度話事人咁。
《蘋果》查探後發現，拍打警車嘅惡爺係綽號「元朗上海仔」，有江湖中人話佢係過氣蠱惑仔，成日飲醉酒鬧事。事件惹起網民議論紛紛，質疑阿Sir對惡人軟弱得滯。貼片者更留言慨嘆：「到底片中邊個最大？12點之後元朗係邊個話事？」
呢單「警察被蝦」喺周日凌晨3點發生，着夏威夷恤嘅「元朗上海仔」同兩個friend喺西裕街馬路打橫行，咁啱一部新界北衝鋒車路過，車上有三名警員，包括女警長、男警及司機。當時元朗上海仔突然走埋警車叫囂，先係拍打車身、車頭，跟住隔住擋風玻璃「手指指」疑似指罵車內嘅警員。同行者已幫忙拉開佢免衝突，警車上Madam懷疑見到對方飲醉咗，未有追究，衝鋒車就咁開走咗。
惡人遭更惡人喝退
元朗上海仔繼續喺馬路上橫行，令人側目，但惡人自有惡人磨，無幾耐出現咗一個黑衣男，破口指罵佢：「你乜事啊你？嘈乜嘢啊？」黑衣男身邊仲出現咗六、七個大漢，追住元朗上海仔嚟鬧，一時間粗口滿天飛。元朗上海仔見唔對路，同朋友急急散水，短片至此結束。段片曝光後，大批網民留言質疑警方反應不夠強硬。
識睇睇留言
Steven：不可思議警察驚到即刻踩油走人！
Wah Wah Wan：新界自主，新界自決，新界獨立！
John Chan：條片好清楚，警察要由黑幫解圍逃出險境！
資料來源：《蘋果》網站