周日嘅西甲爆出大冷門，巴塞隆拿作客利雲特雖有菲臘比古天奴連中三元，但主隊前鋒艾曼紐保定亦都着晒火連轟三粒，最終以4:5輸波之餘，跨季43場聯賽不敗紀錄更就此斷纜。呢場賽事更開出100倍主其他波膽，真係輸死唔少巴塞捧場客！
可能主力美斯冇隨隊，巴塞上半場攻不銳守不穩，九分鐘已經畀加納前鋒艾曼紐保定攻破大門，助利雲特領先1:0。保定之後喺30分鐘又再破網，不過古天奴喺八分鐘後建功，幫巴塞完半場前追成1:2。換邊後伊尼斯巴迪希迅速幫利雲特射成3:1，而保定喺49分鐘更轟入個人今場第三球，加上伊尼斯巴迪希再建一功，利雲特戰至56分鐘已大幅領前巴塞5:1。
古天奴戴帽無補於事
即使古天奴之後分別喺59同埋64分鐘士哥，蘇亞雷斯在71分鐘亦主射12碼中鵠，惟已穩奪聯賽及西班牙盃雙料冠軍嘅巴塞最尾以4:5不敵利雲特，未能成為西甲歷嚟首支喺單季38聯賽以不敗身封王嘅球隊。
巴塞對上一次喺聯賽輸波已經係17年四月嘅事，當時馬拉加主場以2:0擊敗巴塞，巴塞之後喺聯賽未輸過。巴塞教練華維迪對球隊嘅防守非常不滿：「我哋嘅後防唔夠堅固，每當佢哋進攻就有波入。對於我哋嚟講，一場波失五球唔係一件正常嘅事。利雲特打得好好，我哋完全控制唔到佢哋。」佢又批評巴塞上半場嘅差劣表現：「我哋上半場瞓着咗，以為下半場仲有得追。」
保定成科蘭繼承者
巴塞對上一次喺比賽失五球，已經要數到去03年嘅12月。雖然當年的巴塞擁有古華特、沙維等球星，但當時以1:5不敵馬拉加。
至於贏波嘅利雲特當然開心，球員賽後都留喺球場同球迷慶祝，直頭好似贏咗聯賽冠軍咁。喺呢場波轟入三粒嘅艾曼紐保定亦都非常威水，事關自2005年以嚟，未有球員可以對巴塞大演帽子戲法。而對上一個就係烏拉圭球星科蘭，佢喺05年作客巴塞連中三元，協助維拉利爾最終賽和3:3保住一分。
