市場上藍牙喇叭選擇非常多，要出位就要諗下新點子。Sony剛推出一系列主打派對上使用的藍牙喇叭，當中最高階是XB41。講得上要適合派對，XB41機身上就圍上可變色的LED燈，而且單元及旁邊都加入閃燈，LED燈跟閃燈都會因應音響節奏而轉換花款。正所謂有聲有色，玩顏色之外，XB41都在音效上做工夫。XB41本身音量都相當大，並且加上重低音EXTRA BASS音效，以及音場較闊的LIVE SOUND模式，「焚機」都唔錯！
不過講到XB41最特別玩法是可以變成樂器，當成鼓係咁打！這個名為Party Booster的玩法，只要敲打喇叭上的5個平面都會發出唔同聲響。概念確實特別，但實際上比較用力打擊先會發聲，記者打到手腫都做唔到見得人的效果，所以決定請音樂人Rapper MastaMic試玩。
始終XB41都只是一隻喇叭，敲擊部份純屬噱頭，MastaMic初步試玩下就覺得好一般。「鼓的基本節奏如Bom、Bak，如將喇叭放在桌上打並唔順手；如果拎上手時，又不夠時間打出多變的Pattern。而且好多時會甩音，連基本打擊節奏都未必做得到。」官方宣傳片中，男男女女在派對上即興拎起喇叭打Beat Jam歌，MastaMic就認為真正在派對上唔會有人咁做，真想分享自己音樂的話，帶真正樂器好過。
試聽MastaMic自己作品《Fire》，他發現音樂中一種名為808的低音鼓聲拖尾震動效果，在XB41中表現唔到，中頻會突出少少，但整體上只是一款正常普通喇叭。反而他覺得喇叭又變色又閃燈，聯想起細個時見貨車司機所用的喇叭。
Sony SRS-XB41
售價：$1,590
記者：布偉倫
攝影：徐振國
全新旅遊專頁，即like籽想旅行： https://fb.com/travel.appleseed
