在元朗街頭「挑戰」警隊衝鋒車嘅元朗上海仔，據悉姓張，年約50歲，有黑幫14k背景，佢舊年1月曾喺於元朗金祥坊連環遇襲，兩度被敵人私家車撞飛，仲被連斬多刀重傷。不過佢可能真係骨格精奇，事後都完全康復。
據講今次佢醉酒鬧事，仲害埋EU車上女警長及兩名阿Sir俾上司照肺。據聞新界北警隊高層今次嬲到震主要有三大原因，第一，雖然女警長解釋話係因見對方醉酒才不追究，但從網上熱傳影片所見，顯示警員處理手法好似好懦弱，非常難看，唔夠專業；第二係車上眾人當時冇留意到衝鋒車後原來有另一批人正向元朗上海仔叫囂，即係有開片嘅可能；第三，女警長事後未有即時向上司報告。所以阿Sir初步決定將喺區內做高調巡查及行動，以打擊黑幫氣燄。