東區區議會佳曉選區補選投票6月10日進行，距離投票時間不足一個月之際，各類有關候選人嘅傳聞又再湧現。
有網民近日喺面書一個群組內質疑，獲民建聯同工聯會聯手支持嘅「Tree根」鍾樹根前助理植潔鈴，疑似有學歷問題，引述有街坊質問植潔鈴嘅學歷時，植避而不答甚至block人，又話有街坊懷疑植喺城大畢業典禮當日係借其他畢業生件袍影相，就當自己畢咗業。
八方搵過植潔鈴求證，植潔鈴電話中回應話自己係2014年城大英文系嘅學士畢業生，如果有人質疑，可以搵城大英文系查證。對於有網民聲稱問佢學歷時被拒，植潔鈴就話：「係咩？我唔知，無留意到㖭！」強調：「我哋通常都唔會block人喎。」東區補選候選人尚有陳真真同李鳳琼。