祖雲達斯禮拜日作客同10人應戰嘅羅馬賽和0:0，喺得番一輪比賽嘅情況下，領先排第二嘅拿玻里四分，提前一輪奪得意甲冠軍。奪得隊史第34個聯賽冠軍嘅祖雲達斯不但破紀錄喺意甲七連冠，並成為第一支連續四季贏得聯賽及盃賽雙冠王嘅意大利球隊。
上周三喺意大利盃決賽大炒AC米蘭4:0嘅祖雲達斯，周日對羅馬只需要拎一分，就可以穩奪聯賽冠軍，結果祖記就因為羅馬嘅尼恩高蘭兩黃一紅被逐，喺68分鐘打多個人，最後同羅馬打和0:0，37戰得92分續居榜首。雖然拿玻里同日作客以2:0贏咗森多利亞，但得番一輪比賽落後祖記四分，祖記得以將連贏意甲冠軍紀錄改寫至七連冠，拿玻里只能取得第二名。