3.11立法會補選曲終人散，候選人嘅選舉開支陸續公開，落選嘅新民黨陳家珮使咗187萬，但原來唔少去咗建制派嘅口袋，其中民建聯就袋唔少。喺選舉前兩日，陳家珮透過民建聯張國鈞律師樓，向對手區諾軒發律師信，指控佢違反選舉舞弊條例，一封信就收咗陳家珮5,500蚊。
除咗張國鈞，19位工聯會、民建聯嘅區議員嘅辦事處亦收咗錢，由幾十到幾百蚊都有。一場為陳家珮、鄭泳舜、鄧家彪開嘅告急記者會，喺福建社團聯會嘅地方召開，聯會就收咗共1,200蚊。陳家珮亦喺報章落廣告，《星島日報》收咗佢近2.3萬元，《明報》就咗近3.5萬元。
另外，點解會有咁多街坊出席建制派嘅造勢大會？3月一場喺添馬公園搞嘅造勢大會，為建制派3人催票，新民黨負責5車旅遊巴，分別由天水圍、屯門、沙田、大埔出發，共花6,100蚊。
葉劉捐萬七
陳家珮嘅187萬元點嚟？184萬係由新民黨支付，而黨主席葉劉就攞咗近萬七蚊出嚟。
被指𠝹票嘅「中間超人」黃成智，一共用咗77萬，但其中60萬就去咗一間叫做Afrotim嘅公司，包辦黃成智嘅選舉工程。被質疑資金來源嘅黃成智，公佈20萬元來自佢細佬、城大人文社會科學院副院長黃成榮，另一位家人黃秀群亦捐咗20萬畀佢。