蘇超聯賽喺周日進行煞科戰，上演最後三場比賽。下季會由前利物浦名將謝拉特接手嘅格拉斯哥流浪，作客喜伯年場波認真刺激，短短45分鐘裏面，先由喜伯年連入三球領先到3:0；格流到25分鐘由達華尼亞破蛋，之後再由佐敦羅斯達同埋般奴艾維斯分別喺27同40分鐘各入一球，半場追和3:3，開出足智彩賠率有成500倍嘅半場波膽。全場波膽一樣和味，下半場格流一度反超前下，最終兩軍更踢成5:5，「和其他」全場波膽有250倍。賽前有69分嘅格流領先第四位嘅喜伯年三分，只要今場唔淨輸六球，今屆蘇超季軍就袋袋平安，點知真係出現暗湧，好在格流及時止血，最後5:5完場，令格流保住個季軍。