爆相爆片：
台桌遊《誰是強國人》眾籌打「成蟲」

因做政治惡搞桌遊《美麗島風雲》而出晒名嘅台灣公司近日推出《誰是強國人》桌遊，內容影射港澳台同西藏被中國吞噬嘅情況，引起中國不滿，連高雄嘅月光桌遊節都因為有中國廠商施壓而被迫退出，但網上眾籌活動反應非常熱烈，至今比起原定集資額超出5倍。

遊戲背景係2050年，一陣又一陣蟲形黑影不停掠過霧霾。玩家可以選擇「熱烈歡迎強國同胞」同「堅壁清野防守到底」兩種策略，每個國家登場人物亦有唔同設定，好似港澳版圖就有一男一女，男手持雨傘，女以荷官造型示人，強國角色亦有唔少影射，有怪獸用影星成龍金句「中國人是要管」做藍本，玩家可以選擇歸邊或者抗爭到底。