大家可能仲記得「五一」黃金周，有位嚟自河北、傷殘嘅仁兄，揸住架電動三輪車喺吐露港飛馳。估唔到上周四（10號）夜晚10點幾，有位疑似內地大媽帶住電動單車搭港鐵，遇到職員勸阻，竟磕足30個響頭叫職員「畀啲人情」。
讀者王小姐話當時搭緊觀塘線去調景嶺方向，到黃大仙站就見到位大媽「好似揸電單車咁」入車廂。職員到場勸佢都冇用，大媽話要番屋企喎。突然間大媽「咚」一聲跪地，仲開始磕頭。佢帶住超重鄉音嘅廣東話，不停向職員求情：「畀啲人情啦！唔該！求你啦！」職員都好無奈咁安慰大媽，不過佢聽唔入耳，繼續嗌：「皇帝啊！」
港鐵發言人指，當晚彩虹站職員接到乘客報告，喺列車上有女乘客帶同電動單車上車，仲坐喺車上面。職員其後喺開往調景嶺嘅列車上發現該女乘客，提醒佢唔可以帶電動單車進入港鐵範圍。最後職員陪同女乘客喺牛頭角站落車同離開車站。
